पुणे : ‘कला ही परमेश्वराची देणगी आहे. ही कला गुरुकडून शिष्यांकडे हस्तांतरीत होते. प्रत्येक कलाकार हा आपल्या कलेच्या माध्यमातून आपल्या गुरुची सेवा करत असतो. ही सेवा घडताना रसिक श्रोत्यांकडून मिळालेला सन्मान हीच त्याची आयुष्यभराची पुंजी असते,’ अशी भावना बनारस घराण्याचे तबलावादक पं. कुमार बोस यांनी व्यक्त केली.
उस्ताद मेहबूब खानसाहेब मिरजकर यांच्या ५४ व्या तर गुरु उस्ताद मोहंमद हनीफ खान मिरजकर यांच्या पाचव्या स्मृतिप्रीत्यर्थ ‘तालविश्व’च्या वतीने आबासाहेब गरवारे महाविद्यालयाच्या सभागृहांमध्ये ‘संगीत विरासत’ या कार्यक्रमाचे आयोजन करण्यात आले होते.
संगीत क्षेत्रात आपल्या तबलावादनाने वेगळी ओळख निर्माण करणाऱ्या कलाकारांना ‘तालविश्व’च्या वतीने गौरविण्यात येते. या वर्षी प्रसिद्ध तबलावादक पं. कुमार बोस यांना उस्ताद उस्मान खान, उस्ताद फैय्याज हुसैन खान व पं. उपेंद्र भट यांच्या हस्ते ‘उस्ताद मेहबूब खानसाहेब मिरजकर’ पुरस्काराने सन्मानित करण्यात आले. या वेळी माजी आमदार उल्हास पवार, पं. अरविंदकुमार आझाद, पं. रघुनाथ खंडाळकर, पं. विठ्ठल क्षीरसागर, ‘तालविश्व’चे नवाझ मिरजकर, रिझवान मिरजकर, केतन बिडवे आदी मान्यवर उपस्थित होते.
या कार्यक्रमात बनारस घराण्याचे प्रसिद्ध तबलावादक पं. कुमार बोस यांच्या वादनाला तन्मय देवचक्के यांनी संवादिनीवर साथसंगत केली. प्रसिद्ध सितारवादक मोहसीन खान व सरोदवादक सारंग कुलकर्णी यांच्या जुगलबंदीला उपस्थित रसिकांनी भरभरून दाद दिली. त्याला नवाझ मिरजकर व केतन बिडवे यांनी तबल्यावर साथसंगत केली.
या वेळी बोलताना पं. कुमार बोस म्हणाले, ‘पुण्याने कला क्षेत्राला अनेक दिग्गज कलाकार दिले आहेत. चोखंदळ पुणेकर कलाकाराची पारख करून त्याचप्रकारची दाद देतो. येथे वादन करताना नेहमीच ठेवणीतील काहीतरी सादर करावे लागते.’
कार्यक्रमाचे सूत्रसंचालन रिझवान मिरजकर यांनी केले, तर केतन बिडवे यांनी आभार मानले.